அம்மா சுட்ட தோசை

·        அம்மாவிற்கு பிடித்தது இட்லி.

ஐந்து குழந்தைகளுக்கு தோசை சுட்டால்

நேரம் என்ன ஆவது என்பார்.

·         பிடிவாதத்தால் தோசைகளும் கிடைக்கும்.

பல நேரங்களில் ‘அடி’தோசை தான் கிடைக்கும்.

·         வளர்ந்த பிறகு தான் தெரிந்தது.

கனமான கல்தோசையை தான்

தோசை என பலகாலம் ஏமாற்றியிருக்கிறார் என!

·         வளர்ந்த நாட்களில்

மெல்லிசா ஏன் சுட்டுத்தரவில்லை என்றால்,

’பசங்களுக்கு பசி அடங்காதுடா! என்பார் அன்புடன்.

·         உட்கார வைத்து விதவிதமாய் மணக்க மணக்க

சுட்டு பரிமாறலாம் என்றால்

காலம் இருவருக்கும் ஐநூறு கி.மீட்டர்

தூரம் வைத்திருக்கிறது.

·         எத்தனை விதமாய் சுட்டாலும்,

அம்மா தரும் கனமான தோசைக்கும், சாம்பருக்கும் தான்

சுவை அதிகம் இருக்கிறது.

- குருத்து

கற்றல்!

எதிர்த்த வீட்டு அருளம்மா,

பக்கத்துவீட்டு பாத்திமாக்கா

அடுத்த தெருவில் இருந்து வரும் பாட்டியம்மா – என

பலரும் எங்க வீட்டு முருங்கை கீரையை

வாங்கி செல்கிறார்கள்!

தேனாம்பேட்டையிலிருக்கும் சகோதரி

வரும் பொழுதெல்லாம் கீரை கொண்டுவரசொல்லி

நினைவுப்படுத்துகிறாள்!

வீட்டிற்கு வரும்பொழுதெல்லாம்

தோழி கீரை கொண்டு போகிறாள்!

இப்பொழுதெல்லாம் நானும்

கீரை சாப்பிட ஆரம்பித்திருக்கிறேன்! :)